2027-жылы кайсы тармакка канча акча бөлүнөт?
Кыргызстанда 2027-жылга карата республикалык бюджеттин кирешеси 727,3 млрд сом деп пландалууда. Бул 2026-жылга салыштырмалуу 176,1 млрд сомго же 31,9%га көп. Анын ичинде салыктык кирешелер 634 млрд сомду түзөт. Бул тууралуу кече Министрлер Кабинетинин жыйынында "Кыргыз Республикасынын 2027-жылга жана 2028–2029-жылдардын пландык мезгилине республикалык бюджети жөнүндө" Мыйзам долбоору каралып жатканда маалымдалды.
Билдирүүгө караганда, кийинки жылы бюджеттен социалдык тармактарга ири суммадагы каражат бөлүнөт.
- Билим берүүгө – 134,2 млрд сом (+45,2 млрд);
- Саламаттык сактоого – 76,4 млрд сом (+21,7 млрд);
- Социалдык коргоого – 47,3 млрд сом (+21,6 млрд).
Инфраструктурага канча каражат кетет?
КабМин төрагасы Адылбек Касымалиев бюджет бүгүнкү маселелерди чечүү менен катар эртеңки экономиканын пайдубалын түптөөгө тийиш экенине токтолуп, бул багытта инвестициялар жана стратегиялык долбоорлор боюнча да ири каражаттар бөлүнөөрүн белгиледи.
Ага ылайык, 2027-жылы капиталдык курулушка ички булактардан 27,8 млрд сом бөлүү каралууда. Анын ичинен:
- 17,7 млрд сом — Барскоон–Бедел унаа жолуна;
- 10 млрд сом — социалдык объекттерге, ичүүчү суу, ирригация жана жол инфраструктурасына багытталат.
Социалдык төлөмдөр
2027-жылдан тартып бийик тоолуу жана алыскы аймактарда жашаган көп балалуу энелерге «Бала Береке» бир жолку төлөмү бериле баштайт. Мындан тышкары, «Бала ырысы» жөлөкпулу жана шарттары катаал бийик тоолуу аймактардагы электр энергиясына 50% компенсация берүү улантылат.
“Президентибиз белгилегендей, мамлекеттин колдоосу биринчи кезекте ага көбүрөөк муктаж болгон үй-бүлөгө жетиши керек”-деди өз сөзүндө Адылбек Касымалиев.
Жыйындын соңунда, Министрлер Кабинети 2027-жылга жана 2028–2029-жылдардын пландык мезгилине республикалык бюджеттин долбоорун жактырып, аны Жогорку Кеңешке киргизүүнү тапшырды.
