Эттин баасы: жайыттагы малдын эти бордоп семиртилгенден канчалык айырмаланат
Бордоп семиртилген малдын этинин өздүк наркы жайыттагы малга караганда дээрлик 3 эсеге жогору. Кыргызстанда эттин чекене баасына малды багуу технологиясы, тоюттун наркы, салмак кошуу көрсөткүчү, ветеринардык тейлөө, транспорт жана башка чыгымдар түздөн-түз таасир этет.
Суу ресурстары, айыл чарба жана кайра иштетүү өнөр жайы министрлигинин эсептөөлөрүнө ылайык, бордоп семиртүү шартында багылган бодо малдын этинин 1 килограммынын өздүк наркы - 655,67 сомду түзөт. Ал эми жайытта багылган малдын этинин өздүк наркы - 230,82 сом деп эсептелген. Башкача айтканда, бул эки ыкманын ортосундагы айырма 424,85 сомду түзөт.
Билдирүүгө караганда, жайытта мал багууда сатып алынуучу тоютка кеткен чыгым салыштырмалуу аз болот. Бирок мындай шартта малдын суткалык салмак кошуусу жайыраак жүрөт.
Ал эми бордоп семиртүүдө тоютка чыгым көбүрөөк кеткени менен, туура рацион жана багуу шарттары камсыздалганда малдын суткалык салмак кошуусу 0,8–1,0 килограммга жана андан жогору жетиши мүмкүн.
Учурда республика боюнча малды бордоп семиртүү менен алектенген ишкерлер тарабынан 27 595 баш мал бордолууда.
Кыргызстандагы эттин баасы
2026-жылдын сентябрь айына карата Кыргызстанда уй этинин орточо чекене баасы 774,4 сом/кг, кой эти 810,6 сом/кг болгон.
Салыштыруу үчүн, министрлик кошуна мамлекеттердеги эттин баасын кароого сунуштайт. Ага ылайык, Өзбекстанда уй этинин баасы болжол менен 934 сом/кг, кой эти 1 007 сом/кг деңгээлинде. Тажикстанда бул көрсөткүчтөр тиешелүүлүгүнө жараша 928 жана 1 010 сом, ал эми Казакстанда уй эти 810 сом, кой эти 892 сом болгон.
Ушундан улам, Кыргызстандагы эттин чекене баасы бир катар коңшу өлкөлөргө салыштырмалуу төмөндүгүн аталган министрликтен билдиришүүдө.
Маалыматка ылайык, учурда ички рыноктогу баанын туруктуулугу өндүрүш көлөмүнө гана эмес, тоюттун баасына, логистикалык чыгымдарга, сезондук факторлорго жана тышкы суроо-талапка да байланыштуу болуп турат.
