ЖК салык маселелерине байланышкан мыйзам долбоорун биринчи окууда колдоду
Бүгүн, ЖКтин Финансы, бюджет, ишкердик жана атаандаштыкты өнүктүрүү боюнча комитетинин жыйынында Министрлер Кабинетинин Төрагасы демилгелеген «Кыргыз Республикасынын салык салуу чөйрөсүндөгү айрым мыйзам актыларына өзгөртүүлөрдү киргизүү жөнүндө» мыйзам долбоору биринчи окууда каралып, жактырылды.
Экономика жана коммерция министри Бакыт Сыдыков тааныштырып, мыйзам долбоору Кыргыз Республикасынын мыйзамдарынын өркүндөтүү, укуктук жөнгө салуунун ачыктыгын жана натыйжалуулугун жогорулатуу максатында иштелип чыккандыгын билдирди.
Билдирүүгө караганда, сунушталып жаткан чаралар тигүү жана текстиль өнөр жайынын субъекттерин, ошондой эле электрондук соода аянтчалары аркылуу товарларды сатууну жүзөгө ашырган ишкердик субъекттерин ири логистикалык борборлордун ишиндеги келип чыккан үзгүлтүктөрдүн шарттарында колдоого багытталган.
Андан тышкары, жыйында Министрлер Кабинетинин Төрагасы тарабынан демилгеленген “Ишкердиктин субъекттерине текшерүүлөрдү жүргүзүүнүн тартиби жөнүндө” Кыргыз Республикасынын Мыйзамына өзгөртүүлөрдү киргизүү тууралуу” мыйзам долбоору биринчи окууда колдоого ээ болду.
Баяндама жасаган Кыргыз Республикасынын Башкы прокурорунун орун басары Залкар Акназаров белгилегендей, мыйзам долбоору ыйгарым укуктуу органдар тарабынан жүргүзүлүүчү ишкердик субъекттерин текшерүүнү прокуратура органдарында катталгандан кийин гана жүргүзүүнүн укуктук механизмдерин иштеп чыгууга жана киргизүүгө багытталган.
Ошондой эле жыйында өнүктүрүү фонддорунун (эки тараптуу мамлекеттер аралык өнүктүрүү фонддорунун) учурдагы ишмердүүлүгү жана мамлекеттик инвестицияларды башкаруунун натыйжалуулугун жогорулатуу боюнча чаралар жөнүндө маалымат угулду.
