Бишкектин коомдук автобустары үчүн 25 млн сомго мотор майы сатып алынат
Бишкек шаардык транспорт башкармалыгы шаардык автобустар үчүн 50 миң литр мотор майын сатып алууга даярдыгын жарыялады. Сатып алуунун пландалган баасы 25 млн сомду түзөт. Сатып алуулар порталындагы маалыматка ылайык, SAE 15W-40 мотор майы кысылган жаратылыш газы (CNG) менен жүргөн, газ кыймылдаткычтуу автобустар үчүн колдонулат.
Пландалган нарк боюнча бир литр майдын эсептик баасы 500 сомду түзөт. Бирок акыркы баа сынактын жыйынтыгына жараша аныкталат.
Талапка ылайык, жеткирүүчү майды келишим түзүлгөндөн кийин алты айдын ичинде Бишкекке буйрутма берүүчүнүн өтүнмөлөрүнүн негизинде жеткирип турууга тийиш. Ар бир өтүнмө алынгандан кийин товарды жеткирүүгө бир жумушчу күн берилет.
Тендерге катышуу үчүн арыздар 2026-жылдын 8-октябры саат 09:00гө чейин кабыл алынат. Сатып алуу чектелбеген конкурс ыкмасы менен өткөрүлөт. Алдын ала төлөм каралган эмес. Товар кабыл алынгандан кийин анын наркынын 100% төлөнөт.
Жеткирүү мөөнөтү кечиктирилген учурда келишимдин суммасынын ар бир күн үчүн 0,1% өлчөмүндө айып пул каралган. Анын жалпы көлөмү келишимдин суммасынын 5%ынан ашпоого тийиш.
