Кыргызстан Алматы - Бишкек экономикалык коридорун өнүктүрүүнү сунуштады
Кыргызстан Борбордук Азия аймактык экономикалык кызматташтык (ЦАРЭС) программасынын алкагында экономикалык жана транспорттук коридорлорду активдүү өнүктүрүүнү, ошондой эле соода жол-жоболорун санариптик форматка өткөрүүнү сунуштады.
Бул тууралуу Экономика жана коммерция министринин орун басары Султан Ахматов 29-сентябрда Улан-Батордо өткөн ЦАРЭСтин 25-министрлик конференциясында билдирди.
Панелдик сессияда ал соода-экономикалык кызматташтыкты жана транспорттук-логистикалык байланыштарды өнүктүрүү боюнча Кыргызстандын артыкчылыктарын белгилеп, мисал катары Алматы–Бишкек экономикалык коридорун атады.
Анын айтымында, экономикалык коридорлор сооданы кеңейтүүгө жана туруктуу нарк жаратуу чынжырларын түзүүгө шарт түзөт. Бул үчүн соодадагы тоскоолдуктарды жоюп, жол-жоболорду санариптик форматка өткөрүү зарыл.
Конференцияда мындан кийинки кызматташтыктын негизги багыттары катары аймактык экономикалык интеграция, транспорттук-логистикалык байланыштарды күчөтүү, санариптик коридорлорду өнүктүрүү, жеке секторду, туризмди жана капитал рынокторун өнүктүрүү белгиленди.
Ошондой эле Кыргызстан Улуттук электрондук логистика системасын (NELS) түзүү боюнча жол картасын жана уюштуруу моделин даярдоого өтүп жатканы айтылды. Азия өнүктүрүү банкынын колдоосу менен системага изилдөө жүргүзүлүп, кийинки этапта долбоордун техникалык-экономикалык негиздемесин даярдоо пландалууда.
25-министрлик конференцияга Кыргызстандан Экономика жана коммерция министринин орун басары Султан Ахматов жана Монголиядагы Кыргызстандын элчиси Айбек Молдогазиев катышты.
