Кыргызстан менен Казакстандын жогорку аудит органдары меморандумга кол коюшту
Кыргызстандын Эсептөө палатасы менен Казакстандын Жогорку аудитордук палатасынын ортосунда Өз ара түшүнүшүү жөнүндө меморандумга кол коюлду. Документке кол кою Астана шаарында Кыргызстандын Эсептөө палатасынын төрагасы Алмазбек Акматовдун иш сапарынын алкагында ишке ашырылган.
Эсептөө палатасынын маалыматына ылайык, меморандум эки өлкөнүн жогорку аудит органдарынын көп жылдык кызматташтыгын улантып, өз ара аракеттенүүнүн жаңы баскычын баштайт. Тараптар мындан ары эки тараптуу жана эл аралык бирикмелердин алкагында кызматташууну күчөтүүгө даяр экенин билдиришти.
Эске салсак, 2008-жылы Бишкекте Кыргызстандын Эсептөө палатасы менен Казакстандын республикалык бюджеттин аткарылышын контролдоо боюнча Эсеп комитетинин ортосунда кызматташтык жөнүндө макулдашууга кол коюлган.
Меморандум Казакстандын Жогорку аудитордук палатасынын түзүлгөндүгүнүн 30 жылдыгына арналган «Келечектин мамлекеттик аудити: инновациялар, санариптик трансформация жана туруктуу өнүктүрүү» аттуу эл аралык илимий-практикалык конференциянын алкагында түзүлдү.
