Кыргызстанда 6 миңден ашуун жумушсуз жаран кесиптик окуудан өттү
Кыргызстанда сентябрь айына чейинки отчеттук мезгилде 6 миңден ашуун жумушсуз жаран эмгек рыногунда талап кылынган кесиптерге окутулуп, сертификаттарды алышты. Бул тууралуу Эмгек, социалдык камсыздоо жана миграция министрлигинин Иш менен камсыздоого көмөктөшүү башкармалыгынын башчысы Наргиза Туркебекова басма сөз жыйынында билдирди.
Адистин айтымында, окутуу республикалык бюджеттин жана донордук долбоорлордун алкагында жүргүзүлүүдө. Жарандар Агартуу министрлигине караштуу кесиптик лицейлерде жана талапка жооп берген жеке окуу жайларда окушат. Ал эми окуу жайлар менен бир жылдык мөөнөткө келишим түзүлөт.
Окуу курстары кесипке жараша 1 айдан 3 айга чейин созулат. Учурда эмгек рыногунда жумушчу кесиптерге суроо-талап жогору.
“Окутуу курстары кесиптин өзгөчөлүгүнө жараша 1 айдан 3 айга чейинки мөөнөттө өткөрүлөт. Мисалы, курулуш тармагында ширетүүчү кесибине суроо-талап жогору болгондуктан, бул багытта адистер 3 айлык окуу курстарында даярдалат. Калган кесиптер боюнча окутуунун мөөнөтү адистиктин өзгөчөлүгүнө жараша 1 же 2 айды түзөт”,- дейт Наргиза Туркебекова.
