Ишкерлердин салыгы жана айып пулдар: Жогорку Кеңеште мыйзам долбоору талкууланды
Бүгүн, Жогорку Кеңештин жыйынында салык салуу чөйрөсүндөгү айрым мыйзам актыларына өзгөртүүлөрдү киргизүүнү караган мыйзам долбоору биринчи окууда кабыл алынды. Экономика жана коммерция министри Бакыт Сыдыков баяндама жасап, долбоор мыйзамдарды өркүндөтүү, укуктук жөнгө салуунун ачыктыгын жана натыйжалуулугун жогорулатуу максатында иштелип чыккандыгын билдирди.
Долбоорду талкуулоо учурунда депутаттар ишкерлерге салыктык жүктү азайтуу, айып пулдардын өлчөмү, салык кызматкерлеринин жоопкерчилиги жана айрым тармактарга жеңилдик берүү маселелерин көтөрүштү.
Депутат Гүлшаркан Култаева базарлар, соода ишканалары жана тейлөө тармагынын өкүлдөрүнүн кайрылууларын айтып, салыкты Салык кызматы гана чогултушу керектигин белгиледи. Анын айтымында, салыкты базардын администрациясына чогултуу милдетин жүктөп, аткарылбаган учурда айып пул салуу туура эмес.
Салык кызматынын башчысы Алмамбет Шыкмаматов учурдагы механизмди сактап калуу менен 1 млн сомдук айып пулдун өлчөмүн азайтуу маселесин тиешелүү тараптар менен талкуулоону сунуштады.
Бирок Салык кызматынын башчысы Алмамбет Шыкмаматов ушундай эле механизмди калтырып, 1 млн сомдук айып пулду азайтуу боюнча тиешелүү бардык тараптар менен маселени талкуулоо сунушун берди.
Талкууда айып пулдардын өлчөмү да козголду. Депутат Нилуфар Алимжанова акциздик товарларга байланыштуу чакан ишканаларга да ири өлчөмдөгү айып пулдар салынып жатканын айтса, депутат Улан Сариев кайталанган мыйзам бузуулар үчүн салынган айып пулдар ишкерлерге терс таасирин тийгизерин белгиледи.
Мындан тышкары, депутаттар ишкерлердин сунуштарын эске алуу, мыйзам долбоорундагы айрым түшүнүктөрдү тактоо, тигүү тармагын колдоо, ишкерлерге салыктык каникул берүү мүмкүнчүлүгүн кароо жана чет өлкөдө иштеген эмгек мигранттарына салыктык жеңилдиктерди берүү маселелерин көтөрүштү.
Кызуу талкуудан соң, мыйзам долбоору биринчи окууда кабыл алынды.
