Жылуулук насосуна 1 млн сомго чейин 6% насыя берилет
Жылытуу мезгилинин алдында Бишкектеги Энесай-1 конушунун тургундарына жылуулук насосторун сатып алууга жана орнотууга берилүүчү мамлекеттик жеңилдетилген насыянын шарттары түшүндүрүлдү. Бул тууралуу Финансы министрлигинен кабарлашты.
Билдирүүгө караганда, жолугушуу №21 мектепте өтүп, ага 73 адам катышкан. Анда Финансы министрлигине караштуу КЛББнын насыялоо боюнча консультанты Адилет Акматов Бишкек шаарынын жана Чүй облусунун тургундары жылдык 6% менен беш жылга чейин 1 млн сомго чейинки насыя ала аларын билдирген.
Насыяны экологиялык жактан таза жылытуу системаларын сатып алууга, орнотууга жана аларга байланыштуу чыгымдарды жабууга жумшоого болот.
Жылуулук насостору боюнча адис Бахтияр Калимов жабдуунун электр энергиясын керектөөсү жана ай сайынкы чыгымдары тууралуу маалымат берди. Анын айтымында, чыгым ар бир үй үчүн өзүнчө эсептелет. Буга үйдүн аянты, жылуулукту кармоо деңгээли, жабдуунун өзгөчөлүктөрү жана аба ырайы таасир этет.
Адис сунушталган эсептөөлөргө таянып, жылуулук насосу менен жылытууга кеткен чыгым көмүр менен жылытууга салыштырмалуу дээрлик төрт эсеге аз болушу мүмкүн экенин айтты.
Жолугушуунун жүрүшүндө жылуулук насостору орнотулган үйлөр тууралуу видеолор көрсөтүлүп, жабдууларды колдонуу тажрыйбасы менен тааныштырылды.
Иш-чара Финансы министрлиги Дүйнөлүк банктын Эл аралык өнүктүрүү ассоциациясынын колдоосу менен ишке ашырып жаткан "Кыргыз Республикасында абанын сапатын жакшыртуу" долбоорунун алкагында өттү.
