Кыргызстанда картошканын импортуна алты айга чектөө киргизүү сунушталууда
Кыргызстанда картошканын импортун 6 айга убактылуу чектөө сунушталууда. Тиешелүү токтомдун долбоорун Суу ресурстары, айыл чарба жана кайра иштетүү өнөр жайы министрлиги коомдук талкууга чыгарды. Сунушталган чара Кыргызстандын картошка өндүрүшүн жана ички рыногун өнүктүрүүгө, дыйкандарды колдоого жана өлкөнүн азык-түлүк коопсуздугун камсыз кылууга багытталган.
Маалыматка ылайык, 2026-жылы Кыргызстанда 1 млн 249 миң 700 тоннага жакын картошка өндүрүлүшү күтүлүүдө. Ал эми калктын жылдык керектөөсү болжол менен 799 миң 700 тоннаны түзөт. Учурда өлкөнүн картошка менен өзүн-өзү камсыз кылуу деңгээли 181,9% деп бааланууда.
Ушуга байланыштуу жергиликтүү өндүрүлгөн картошканы ички рынокто сатууга шарт түзүү максатында анын импортуна 2027-жылдын 1-мартына чейин убактылуу чектөө киргизүү сунушталууда.
Долбоордо ЕАЭБ ТЭИ ТН 0701 90 500 0 коду менен классификацияланган картошканы Кыргызстандын аймагына импорттоого алты айлык мөөнөткө тыюу салуу каралган.
Билдирүүгө караганда, чектөө айрым учурларга жайылтылбайт. Атап айтканда, Кыргызстандын аймагы аркылуу транзит менен өткөрүлүүчү картошкага, ошондой эле токтом күчүнө киргенге чейин Кыргызстандын дарегине жөнөтүлгөн продукцияга тыюу салынбайт. Мындан тышкары, илимий-изилдөө, сыноо жана башка атайын иш-чараларды өткөрүү үчүн зарыл болгон көлөмдө алып келинген картошка да чектөөдөн тышкары болот.
Токтомдун долбоору 28-октябрга чейин коомдук талкууда болот.
