"Электр станциялары" ААКы быйыл кандай иштерди аткарат?
Энергетика министрлиги өлкөдөгү гидроэлектростанциялардын натыйжалуулугун жана ишенимдүүлүгүн жогорулатууга багытталган бир катар долбоорлорду ишке ашырып жатат.
Камбар-Ата ГЭС-2де экинчи гидроагрегатты эксплуатацияга берүү иши жазында башталары пландалып жатат. Ошондой эле жазында Үч-Коргон ГЭСинде эки гидроагрегатты реконструкциялоо иштери башталаары күтүлүүдө.
Планга ылайык, № 2 гидроагрегат боюнча иштер февраль айында, ал эми № 1 гидроагрегат боюнча иштер 1-марттан тарта башталат. Реконструкция иштери параллель жүргүзүлөт, бул станциядагы жабдууларды комплекстүү жаңылоону жана иштерди координациялоо мүмкүнчүлүгүн камсыз кылат.
Аны менен катар Камбар-Ата ГЭС-1дин административдик-тиричилик комплексинде ички жасалгалоо иштери жүргүзүлүүдө. Курулуп жаткан жатаканада инженердик-коммуникациялык иштер, анын ичинде канализация жана суу түтүктөрүн тартуу, ошондой эле ички дубал тосмолорун монтаждоо иштери аткарылууда.
Мындан тышкары, Күрп-Сай ГЭСинин АБТ–220 кВ бөлүгүндө станциянын кубаттуулугун жогорулатуу максатында эки автотрансформаторду (АТ-1 жана АТ-2) алмаштыруу иштери башталды. Биринчи автотрансформаторду жеткирүү 2026-жылдын январь айына, ал эми экинчисин 2026-жылдын март айына пландалган. Монтаждоо иштери 2026-жылдын 1-апрелинен тартып башталып, күз айларына чейин аяктайт.
