Май айынан тарта электр энергиясы 27 тыйынга жогорулайт
2026-жылы электр энергиясынын тарифи май айынан тартып 27 тыйынга көтөрүлөт. Бул тууралуу Жогорку Кеңештин Өндүрүштүк саясат, транспорт, күйүүчү-энергетикалык комплекс, архитектура жана курулуш комитетинин жыйынында Энергетика министри Таалайбек Ибраев билдирди.
Анын айтымында, мурда бекитилген графикке ылайык, ар жылдын май айында электр энергиясынын тарифи көтөрүлөт.
"2027-жылы тариф 33 тыйынга, 2028-жылы — 39 тыйынга, 2029-жылы — 47 тыйынга, 2030-жылы — 57 тыйынга көтөрүлөт. Ошондо гана тариф биздин өндүргөн электр энергиябыздын чыгымын толук жабат", — деп белгиледи министр.
