Министр Шамырканов: Глобалдык жылуулук шартында АЭС куруу зарыл

Кыргызстанда атомдук электр станция куруу маселеси актуалдуу. Атомдук электр станция бүгүнкү күндө жашообуздун ажырагыс бөлүгүнө айлангандыктан, АЭС куруунун жолдорун издөө зарыл, — деп билдирди Өзгөчө кырдаалдар министри Урматбек Шамырканов УТРКга берген маегинде.

Эфирде журналист Кыргызстан сейсмикалык жактан активдүү аймакта жайгашканын белгилеп, мындай шартта АЭС куруу канчалык туура деген суроону узатты.

Министрдин айтымында, глобалдык жылуулук дүйнө жүзүнө терс таасирин тийгизип жатат. Мурда жаан-чачын кадимкидей жаап өтүп кетсе, азыр локалдык мүнөзгө өтүп, кыска мөөнөттүү нөшөрлөр көбөйгөн. Ал мындай жаандарды тиешелүү приборлор кээде аныктабай калып жатканын айтты.

Ошондой эле мурдагы жылдарга салыштырмалуу суунун көлөмү азайып, мөңгүлөр эрип жатканын белгиледи. Анын сөзүнө караганда, бул жагдай келечекте энергия алуунун башка ыкмаларын издөөнү талап кылат.

"Демек, биз келечекте энергия алуунун башка ыкмаларын табышыбыз керек. Ал — атомдук электр станция", — деди Урматбек Шамырканов.