Быйыл “Чакан ГЭС” ААКсы энергетикалык объектилерин модернизациялайт
"Чакан ГЭС" ААКсы 2026-жылга карата иш-планды даярдады. Анда гидроагрегаттарды учурдагы жана капиталдык оңдоо, эски станцияларды реконструкциялоо жана жаңы объектилерди ишке киргизүү каралган. Бул тууралуу Энергетика министрлигинен билдиришти.
Жыл ичинде компаниянын объектилеринде жабдууларды иштөөчү абалда сактоо, авариялардын алдын алуу жана гидроэлектростанциялардын ишенимдүүлүгүн жогорулатуу максатында 300 утурумдук оңдоо иштерин жүргүзүү пландалууда.
Төрт гидроагрегатта капиталдык оңдоо жүргүзүлөт:
- ГЭС-3түн №1 гидроагрегаты;
- ГЭС-4түн №1 гидроагрегаты;
- ГЭС-5тин №2 гидроагрегаты;
- ГЭС-6нын №2 гидроагрегаты.
Капиталдык оңдоо иштерине агрегаттарды толук ажыратуу, негизги түйүндөрүн диагностикалоо, эскирген тетиктерди алмаштыруу, жабдууларды модернизациялоо жана кайра ишке киргизүү кирет. Бул чаралар өндүрүштүк кубаттуулуктарды жаңылоонун узак мөөнөттүү программасынын бир бөлүгү болуп саналат.
Мындан тышкары, ГЭС-1дин №1 гидроагрегатында жана Быстровка ГЭСинин №2 гидроагрегатында оңдоо иштери жүргүзүлөт. 2026-жылы Орто-Токой ГЭСин пайдаланууга берүү, Папан ГЭСинин курулушун улантуу жана Лебединов ГЭСин реконструкциялоо пландалууда. Ошондой эле 20 даана электромобилдер үчүн кубаттоочу станция орнотулат.
Пландалган иштер жабдуулардын кызмат мөөнөтүн узартууга жана 2026–2027-жылдардагы күз-кыш мезгилинде туруктуу иштешин камсыздоого багытталган. Жалпысынан, бул чаралар генерациялоочу кубаттуулуктардын ишенимдүүлүгүн арттырып, электр энергиясын өндүрүүнү көбөйтүүгө жана керектөөчүлөрдү үзгүлтүксүз электр менен камсыздоого шарт түзөт.
