Кыргызстан биринчи жолу "Росатомдун" алдындагы Эл аралык жаштар кеңешине мүчө болду
Кыргыз Республикасынын студенттер Ассоциациясынын президенти Бектан Кыдыев "Росатомдун" жетекчисинин консультативдик кеңешинин 13 мүчөсүнүн бири, Борбордук Азия аймактарынын өкүлү болуп калды.
"Росатом" мамлекеттик корпорациясынын башкы директорунун жетекчилигинин астында түзүлгөн Эл аралык жаштар кеңешинин Impact Team 2050 экинчи курамынын инагурациясы Обнинск шаарында (Россия Федерациясында) өттү. Иш-чара IV Эл аралык "Обнинск NEW 2026" жаштар форумунун алкагында өттү, ага 85 өлкөдөн 700гө жакын катышуучу, 10 өлкөдөн келген жогорку даражалуу делегациялар жана миллиондон ашык студенттер онлайн байланышка чыгышты.
Форумда Кыргызстандын атынан Кыргыз Республикасынын Студенттер ассоциациясынын президенти Бектан Кыдыев катышты. Ал жаштардын атомдук энергетиканы өнүктүрүүдөгү ролуна арналган "Чынжырлуу реакция: Жаштар коомчулугу дүйнөлүк атомдук тармакты кантип өзгөртүп жатат" аттуу пленардык сессияда сөз сүйлөдү.
Impact Team 2050 үчүн талапкерлерди тандоо жогорку атаандаштыкта өттү. Калыстар тобунун кароосуна 85 өлкөдөн 2000ден ашык арыз берилген. Эксперттик тандоо комиссиясынын курамына "Росатом" мамлекеттик корпорациясынын жана Росатом корпоративдик академиясынын жетекчилери, БРИКС жаштар энергетика агенттигинин жетекчилиги жана МАГАТЭнин өкүлдөрү киришкен.
"Кыргызстан үчүн менин Impact Team 2050гө катышуум - жаш лидерлердин эл аралык коомчулугунун бир бөлүгү болуу мүмкүнчүлүгү, келечектин долбоорлорун иштеп чыгууга катышуу жана эң мыкты эл аралык тажрыйбалардан сабак алуу болуп саналат. Жеке мен үчүн бул жаңы билим, эл аралык байланыш, лидерлик көндүмдөрдү өнүктүрүү жана өз өлкөмдү дүйнө жүзүнө таанытуу, алынган тажрыйбаны Кыргызстандын өнүгүшү үчүн реалдуу демилгелерге айландыруу", - деп белгиледи Бектан Кыдыев.
Бектан - А.Карасаев атындагы Бишкек мамлекеттик университетинин "Экология жана жаратылышты пайдалануу" багыты боюнча студенти, студенттер Ассоциациясынын президенти жана Кыргыз Республикасындагы БУУнун жаштар консультативдик кеңешинин төрагасынын орун басары.
""Росатомдо" биз таза энергиянын жана жогорку технологиялардын келечегин жаштар менен түз диалогсуз куруу мүмкүн эмес экенин билебиз. Impact Team 2050 кеңеши жаш лидерлерге глобалдык процесстерге таасир этүү үчүн реалдуу инструменттерди берет. Мындай деңгээлдеги кеңешке Кыргызстандык студенттин катышуусу өлкөнүн жаштар демилгелеринин жогорку потенциалын тастыктайт жана илим менен туруктуу өнүгүү жаатында эл аралык тажрыйба алмашуу үчүн жаңы мүмкүнчүлүктөрдү ачат", - деди "Росатомдун" Кыргызстандагы өкүлчүлүгүнүн башчысы Дмитрий Константинов.
Жалпысынан кеңешке 13 өлкөдөн 13 катышуучу тандалып алынды: Кыргызстан, Өзбекстан, Кытай, Индонезия, Бангладеш, Египет, Эфиопия, Руанда, Танзания, Түштүк Африка Республикасы, Сербия, Венгрия жана Бразилия. Форумдун алкагында алар менен "Росатомдун" башкы директору Алексей Лихачев жолугушту. Эки жыл бою жаш лидерлер атомдук технологиянын мүмкүнчүлүгүн жайылтууга жана анын дүйнө жүзү боюнча жаштар арасында тарапташтарын кеңейтүүгө багытталган эл аралык жаштар долбоорлорун демилгелеп жана ишке ашырып турушат.
Жаңы кеңештин негизги иш багыттарынын бири 2026-жылдын ноябрь айында Түркияда өтө турган БУУнун климаттын өзгөрүшү боюнча COP31 Конференциясы үчүн жаштар программасын иштеп чыгуу болуп саналат. Ошондой эле, программанын алкагында кеңештин мүчөлөрү "Росатомдун" башкы директору Алексей Лихачев менен экинчи ирет жолугушуусу пландаштырылууда.
Маалымат үчүн
Impact Team 2050 - бул "Росатомдун" башкы директорунун жетекчилигинин алдындагы Эл аралык жаштардын консультативдик кеңеши, ал ар кайсы өлкөлөрдөн келген жаш лидерлер менен алдыңкы дүйнөлүк технологиялык корпорациялардын биринин жетекчилигинин ортосундагы диалогду өнүктүрүү үчүн түзүлгөн.
Кеңештин форматы мамлекеттик корпорация менен илимде, өнөр жайда, жаштар коомчулуктарында жана эл аралык уюмдарда олуттуу ийгиликтерге жетишкен жаш лидерлердин ортосундагы ачык жана тең укуктуу өнөктөштүктүн уникалдуу моделин билдирет.
