Нарын электр тармактар ишканасы күз-кыш мезгилине даярдыгын күчөттү
Нарын электр тармактар ишканасында 2026–2027-жылдардагы күз-кыш мезгилине даярдык жана 2027-жылга карата бизнес-план талкууланган жыйын өттү. Жыйынга "Кыргызстан улуттук электр тармагы" ААКтын башкы директорунун биринчи орун басары, пландоо бөлүмүнүн жана бөлүштүрүү электр тармактары кызматынын жетекчилери катышты.
Нарын электр тармактар ишканасынын маалыматына караганда, жыйында электр тармактары менен энергетикалык жабдуулардын техникалык абалы, капиталдык жана учурдагы оңдоо иштеринин жүрүшү каралды. Ошондой эле авариялык кырдаалдарга ыкчам чара көрүү үчүн бригадалардын, атайын техниканын жана материалдык-техникалык каражаттардын даярдыгы текшерилди.
Жооптуу кызматкерлерге оңдоо жана техникалык тейлөө иштерин белгиленген мөөнөттө бүтүрүү, штаттан тышкаркы кырдаалдардын алдын алуу чараларын күчөтүү тапшырылды. Мындан тышкары техникалык жоготууларды жана негизсиз чыгымдарды азайтуу боюнча милдеттер коюлду.
Жыйындан кийин ишкананын кампаларындагы материалдык-техникалык каражаттар жана запастык бөлүктөр текшерилди. Узак убакыттан бери пайдаланылбай турган запастык бөлүктөрдүн абалы каралып, аларды мындан ары максаттуу пайдалануу боюнча тапшырмалар берилди.
Ошондой эле электр тармактарын өнүктүрүү, инфраструктураны жаңылоо жана керектөөчүлөрдү электр энергиясы менен ишенимдүү камсыз кылуу боюнча сунуштар талкууланды.
Жыйындын жыйынтыгында күз-кыш мезгилине даярдык иштерин белгиленген мөөнөттө аяктоо жана 2027-жылга карата бизнес-планды тактоо боюнча тапшырмалар берилди.
