Б.Төрөбаев: Өлкөдө 668 социалдык объектте курулуш жана оңдоо иштери жүрүүдө
Суу ресурстары, айыл чарба жана кайра иштетүү өнөр жайы министри Бакыт Төрөбаев Кара-Суу районундагы Пахтачылык станциясынын имаратынын ачылышында өлкөнүн реалдуу секторундагы иштер боюнча маалымат берди. Бул тууралуу Айыл чарба министрлигинен билдиришти.
Министрдин айтымында, 2025-жылы өлкө боюнча 1 478 км жол курулуп жана капиталдык оңдолду, бул көрсөткүч мурдагы жылдарга салыштырмалуу эки эсе көп. Ошондой эле өлкөнүн аймагында 668 социалдык объектте иштер жүрүүдө: алардын 426сы жаңыдан курулуп, 211и капиталдык оңдоодон өттү, дагы 31 объекттин долбоордук-сметалык документтери даярдалууда.
Бакыт Төрөбаев мындан тышкары “Камбар-Ата ГЭС-1”, “Кытай–Кыргызстан–Өзбекстан” темир жолу жана ири тоннелдер сыяктуу улуттук масштабдагы долбоорлор активдүү стадияга өткөнүн белгиледи. Анын айтымында, бул долбоорлор өлкөнүн энергетикалык жана транспорттук коопсуздугун чыңдоого багытталган.
