Бакыт Төрөбаев Кара-Суудагы жазгы талаа иштерине даярдыктарды текшерди
Суу ресурстары, айыл чарба жана кайра иштетүү өнөр жайы министри Бакыт Төрөбаев Ош облусунун Кара-Суу районунда болуп, жазгы талаа иштерине даярдыктар менен таанышты. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Жыйынга министрликтин аймактык түзүмдөрүнүн өкүлдөрү, Кара-Суу районунун акими, Президенттин Ош облусундагы ыйгарым укуктуу өкүлү Аманкан Кенжебаев, райондун бардык айыл аймактарынын башчылары жана ӨКМдин райондук бөлүмүнүн жетекчиси катышты.
Жыйында тармактык кызматкерлер жазгы талаа иштерине даярдыктар, минералдык жер семирткичтер менен камсыздоо, сугат каналдарын өз учурунда тазалоо боюнча маалымат беришти. Айыл аймактардын башчылары сугат жерлеринин аянты жана пайдаланылуучу каналдар тууралуу маалыматтарды ортого салышты.
Министр Бакыт Төрөбаев дыйкандарга сертификаты бар үрөндөрдү себүүнүн артыкчылыктарын активдүү түшүндүрүүнү жана жазгы талаа иштерине даярдыктарды күчөтүүнү тапшырды.
"Биз дыйкандарга азыртадан сертификатталган үрөндөрдү пайдалануунун артыкчылыктарын түшүндүрүшүбүз керек. Сугат мезгилине көйгөйлөр жаралбашы үчүн сугат каналдарын эртелеп тазалап бүтүшүбүз зарыл", — деди ал.
Ошондой эле тиешелүү адистер районго заманбап техникалар келип жатканын, алардын дыйканчылык тармагына олуттуу салым кошуп жатканын билдиришти. Мындан тышкары, Айыл Банк жана Элдик Банк аркылуу дыйкан-фермерлерге жеңилдетилген насыялар бериле баштаганы маалымдалды.
