"Чатыр-Көл" кинотеатрынын ордуна курулчу маданий борбордун эскизи даярдалды

Бишкек шаарынын мэриясы тарабынан демилгеленген мурдагы "Чатыр-Көл" кинотеатрынын ордунда заманбап маданий борбор куруу долбоорунун алкагында эскиздик долбоор даярдалды. Бул тууралуу муниципалитеттен билдиришти.

Маалыматка ылайык, учурда Бишкек шаарынын мэриясынын Капиталдык курулуш башкармалыгы тарабынан объекттин айланасына тосмолор орнотулуп, имаратты демонтаждоо иштери жүргүзүлүүдө.

2025-жылдын 5-ноябрында болгон өрттөн кийин Бишкек шаарынын мэри объектке барып, анын мындан аркы тагдыры боюнча чечим кабыл алуу жана долбоорду ишке ашыруу иштерин тездетүү боюнча тапшырма берген.

Берилген тапшырманын негизинде бүгүнкү күндө жаңы маданий борбордун эскиздик долбоору иштелип чыгып, долбоорлоо иштери улантылууда.