Кыргызстанда ветеринардык дары каражаттарын каттоо санарип форматка өтөт
Кыргыз Республикасынын агроөнөр жай тармагын санариптештирүү алкагында Ветеринария, мал чарбасын өнүктүрүү, жайыт жана тоют кызматы тарабынан "Ветеринардык дары каражаттарын каттоо жана сертификаттоо" боюнча Автоматташтырылган маалыматтык система (АМС) иштелип чыгууда.
Жаңы система ветеринардык дары каражаттарын каттоо процесстерин толугу менен электрондоштурууга багытталган. Анда арыздарды онлайн кабыл алуу, документтерди текшерүү, QR-код аркылуу төлөм жүргүзүү, лабораторияларга электрондук багыттамаларды жөнөтүү, электрондук чечим кабыл алуу жана QR-коду бар электрондук күбөлүк берүү каралган.
Ошондой эле катталган дары каражаттарынын реестри жүргүзүлүп, маалымат издөө жана аналитикалык модуль ишке кирет. Арыз берүүчүлөр документтерди ЭСК менен онлайн тапшырып, арыздын жүрүшүн реалдуу убакыт режиминде көзөмөлдөй алышат.
АМС арыз берүүчүлөр, лабораториялар жана Борбор ортосунда бирдиктүү электрондук документ жүгүртүүнү түзүп, башка мамлекеттик маалыматтык системалар менен интеграцияланат. Бул система Кыргыз Республикасы үчүн ветеринардык коопсуздукту башкарууда заманбап, ачык жана ишенимдүү санариптик чечим болуп саналат.
