Былтыр "Ала-Арча" жаратылыш паркынын кирешеси 262 млн сомго жеткен
“Ала-Арча” жаратылыш парксынын кирешеси 2020-жылдагы 29 млн сомдон 2025-жылы 262 млн сомго чейин өстү, бул кирешенин дээрлик 9 эсеге өсүшүн көрсөтөт, – деди Президент Садыр Жапаров бүгүн “Ала-Арча” паркындагы асма жолдун ачылышында сүйлөгөн сөзүндө.
Узундугу 1 чакырымды түзгөн асма жол саатына миңге жакын адамды тоонун чокусуна жеткире алат жана туристтер үчүн жаңы мүмкүнчүлүк түзөт. Аны дүйнөгө белгилүү австриялык “Доппел майер” (Doppelmayr) компаниясы куруду.
Президент Садыр Жапаров асма жолду узартуунун экинчи этабы пландалып жатканын айтып, бул аркылуу парк комплекстүү өнүктүрүлөрүн белгиледи. Экинчи этап 12 чакырым аралыкты камтып, парктын эң кооз жана жетүүгө кыйын аймактарына чейин жетүүгө жол ачат.
Учурда паркта заманбап коттедждер пайдаланууга берилүүдө, родельбан курулуп жатат, ошондой эле бассейни бар беш жылдыздуу мейманкананы пайдаланууга берүү мерчемделүүдө.
Президенттин айтымында, бул иштер Кыргызстандын тоо туризмин сапаттуу өнүктүрүүгө, туристтик мүмкүнчүлүктөрдү кеңейтүүгө жана улуттук парктын кооздугун дүйнөгө таанытууга багытталган.
