Чүйдө браконьерлик фактысы аныкталып, жаранга 12 500 сом айып салынды

20-февралда болжол менен саат 23:00 чамасында браконьерликке каршы жүргүзүлгөн пландуу рейддик иш-чаралардын жүрүшүндө Аламүдүн районунун аймагында жаратылышты коргоо мыйзамдарын бузуу фактысы аныкталды.

Жаратылыш ресурстары, экология жана техникалык көзөмөл министрлигинин Чүй регионалдык башкармалыгынын кызматкерлери түнкү текшерүү учурунда кабынан чыгарылган аңчылык куралы менен жүргөн жаранды аныкташкан. Бул аракет Кыргыз Республикасынын мыйзамдарына ылайык аңчылык эрежелерин бузуу болуп эсептелет.

Текшерүүнүн жыйынтыгында укук бузуу жөнүндө протокол түзүлүп, профилактикалык түшүндүрүү иштери жүргүзүлдү. Натыйжада жаранга 12 500 сом өлчөмүндө административдик айып пул салынды.

Чүй регионалдык башкармалыгы браконьерликке каршы күрөш негизги артыкчылыктуу багыттардын бири экенин белгилеп, рейддик иш-чаралар туруктуу негизде улантыларын билдирди. Текшерүүлөр түнкү көзөмөлдү күчөтүүнү, аңчылык аймактарындагы текшерүүлөрдү жана аңчылык пайдалануучулар менен өз ара аракеттенүүнү камтыйт.

Жарандар жаратылышты коргоо мыйзамдарынын талаптарын так сактоого чакырылды.