Бишкек мэри базар аймактарын көрктөндүрүү боюнча тапшырма берди
23-февралда Айбек Джунушалиев шаардык кызматтардын жетекчилери менен биргеликте Свердлов районунун аймагындагы базарларды көрктөндүрүү маселеси боюнча жеринде текшерүү жүргүздү. Бул тууралуу муниципалитеттен билдиришти.
Текшерүүнүн алгачкы объектиси Дордой базары болду. Бул жерде аймакты көрктөндүрүү иштери жүрүп жатканын көргөн мэр көлдүн айланасын тазалоо, камыштардан арылтуу жана көрктөндүрүү иштерин улантуу боюнча тапшырмаларды берди. Белгиленгендей, бүгүнкү күнгө чейин суу сактагычтан 20 тоннадан ашык таштанды чыгарылган. Ошондой эле жолду кеңейтүү жана жаңы жол куруу пландары айтылды.
Тиешелүү кызматтарга жол курууга даярдыкты күчөтүү, долбоорго тоскоол болгон мыйзамсыз объектилер боюнча чара көрүү, жашыл аймактарга автоунаа токтотууга жол бербөө жана базар аймагында көп деңгээлдүү унаа токтотуучу жайлар үчүн мүмкүн болгон тилкелерди кароо милдеттери жүктөлдү.
Андан соң мэр Аламүдүн-1 кичи районунда жайгашкан Динар базары жана Чынар базары аймактарын да текшерди. "Динар" базарынын ижарачысына тротуарларды мурдагы абалына келтирүү жана шаар тургундары үчүн ачык кармоо тапшырылды. Ошондой эле санитардык талаптарды сактоо жана мыйзамсыз объектилерди аныктоо боюнча иштерди күчөтүү тапшырмасы берилди.
Текшерүүнүн жыйынтыгында бир катар жетекчилерге сөгүш жарыяланып, Свердлов районунун башчысына базарларды көрктөндүрүү иштерин жеке көзөмөлүнө алуу жана аймактарды талаптагыдай абалга келтирүү милдети жүктөлдү.
