Баткенде кыргыз-тажик чек арасын тосуу иштери кайра жанданды

Баткен облусундагы кыргыз-тажик мамлекеттик чек ара тилкесинде инженердик тосуу иштери кайра жанданды. Бул тууралуу президенттин аймактагы өкүлчүлүгүнөн билдиришти.

Бүгүн Баткен районунун Ууч жергесинде чек араны тосуу иштери башталды. Курулуш иштерине Мамлекеттик чек ара кызматынын, Өзгөчө кырдаалдар министрлигинин, Коргоо министрлигинин жана Ички иштер министрлигинин аскер кызматчылары тартылган. Керектүү техникалар жана жабдуулар толугу менен даяр экени маалымдалды.

Маалыматка ылайык, 2025-жылы чек араны инженердик тосуу иштери дээрлик 150 чакырым аралыкта аткарылган.

Ал эми 2026-жылы Баткен облусунда 200 чакырым чек ара тилкесин тосуу пландалууда. Анын ичинен 65 чакырымы Баткен районуна, 135 чакырымы Лейлек районуна туура келет. Мындан тышкары, Ош облусунда 70 чакырым чек ара тилкесин тосуу каралган.

Жалпысынан 2025–2026-жылдары 420 чакырым кыргыз-тажик мамлекеттик чек арасын демаркациялоо мерчемделүүдө.