Бишкектин Көк-Жар айылында 750 орундуу жаңы мектеп курулууда
Президенти Садыр Жапаровдун тапшырмасына ылайык, Бишкек шаарында 20 мектептин курулушу жүрүп жатат. Бул иштерди Курулуш министрлиги ишке ашырууда.
Ведомствонун маалыматына ылайык, Көк-Жар айылында 750 орундуу жаңы мектеп салынууда. Долбоор республикалык бюджеттин эсебинен каржыланып, курулушту жыл аягына чейин аяктоо пландалууда.
Учурда жер казуу иштери толук бүткөрүлүп, имараттын пайдубалын куруу этабы жүрүүдө.
Жаңы мектепте окуу класстары, лабораториялар, китепкана, ашкана, компьютердик класс, эмгек кабинеттер, жыйындар залы жана спорт залы каралган. Имарат 3 блоктон турган, 3 кабаттуу болуп курулат.
Мектеп пайдаланууга берилгенден кийин 2000ге жакын окуучу заманбап шартта билим алуу мүмкүнчүлүгүнө ээ болот.
