ИИМ: Айдарбековго байланыштуу жаңы фактылар ачыкка чыкты

Мурдагы тышкы иштер министри Чынгыз Айдарбековго карата козголгон кылмыш ишинин алкагында кошумча мыйзамсыз аракеттер аныкталды. Бул тууралуу Ички иштер министрлигинин басма сөз кызматы билдирди.

Маалыматка ылайык, буга чейин кызматтык абалынан кыянаттык менен пайдалануу, анын ичинде бюджеттик каражаттарды пайдаланууда мыйзам бузуулар аныкталганы айтылган.

Тергөө иш-чараларынын жүрүшүндө Айдарбековдун жашаган жеринде тинтүү жүргүзүлүп, анын жыйынтыгында мүлктүк активдерди мыйзамсыз каттоого тиешеси бар экендигин тастыктаган документтер табылган. Атап айтканда, көп кабаттуу турак жай курулушуна үлүштүк катышуу келишимдери боюнча төлөм квитанциялары, эсептешүү актылары жана анын атына катталган үч келишим алынган.

Ал документтерди жасалмалоо жолу менен, кооперативге кийин мүчө болгонуна карабастан, өзүн турак жай-курулуш кооперативинин негиздөөчүсү катары мыйзамсыз каттатканы аныкталган. Натыйжада кооперативге таандык батир жана башка кыймылсыз мүлк мыйзамсыз ээленип, өзгөчө ири өлчөмдө материалдык зыян келтирилгени белгиленди.

Мындан тышкары, Тышкы иштер министрлигине Түркмөнстандын ТИМинен анын мурдагы ишмердүүлүгүнө байланыштуу вербалдык нота келип түшкөнү маалымдалды. Анда анын контрабанда жана визаларды мыйзамсыз тариздөө фактыларына тиешеси бар экени айтылган. Бул жагдайлардан улам ал дипломатиялык даражаларынан ажыратылган.

Ошондой эле, маалыматтарга ылайык, Чынгыз Айдарбеков мурда Чынгыз Эгембердиев деген фамилия менен белгилүү болгон. Фамилияны өзгөртүү вербалдык нота алынгандан кийин жүргүзүлгөнү айтылды.

Учурда тергөө иштери уланууда. Иштин бардык жагдайларын жана башка тиешеси бар адамдарды аныктоо боюнча чаралар көрүлүүдө.