Бишкекте дизайн-кодго туура келбеген объекттер демонтаждалууда

Бишкек шаарынын экинчи даражадагы көчөлөрүндө жайгаштыруу эрежелерине жооп бербеген жарнамалык конструкцияларды жана интернет чубалгыларын демонтаждоо иштери башталды. Бул тууралуу Курулуш министрлигинен билдиришти.

Бул иштер шаардагы дизайн-коддун экинчи этабын ишке ашыруунун алкагында жүргүзүлүүдө. Анын негизинде Киев көчөсүндө Абдрахманов көчөсүнөн Манас проспектине чейинки тилкеде демонтаждоо иштери башталды.

Шаар куруу жана архитектура департаментинин Бишкек шаар куруу жана архитектура башкы башкармалыгынын адистери шаардык кызматтар менен биргеликте түшүндүрүү иштерин жүргүзүп, бекитилген дизайн-кодго ылайык келбеген фасаддык конструкциялар боюнча эскертүүлөрдү беришүүдө.

Мындан тышкары, демонтаждоо иштери Киев көчөсүнөн тышкары Токтогул, Москва жана Бөкөнбаев көчөлөрүндө да жүргүзүлөт.

Бишкек шаар куруу жана архитектура башкы башкармалыгы ишкерлерди жана шаар тургундарын архитектуралык-техникалык корутунду алуу үчүн онлайн арыз берүүгө чакырат. Бул үчүн cabinet.bga.gov.kg порталы аркылуу жеке кабинет түзүү зарыл.