Бишкектеги №46 мектепке 450 орундуу жаңы корпус курулууда
Курулуш, архитектура жана турак жай-коммуналдык чарба министрлиги тарабынан Бишкек шаарынын Свердлов районунда жайгашкан №46 мектепке 450 орундуу кошумча корпустун курулушу кызуу жүрүүдө. Бул тууралуу ведомстводон билдиришти.
Учурда имараттын “А” блогунда 52 свай орнотулуп, гидроизоляция иштер аткарылууда.
Маалыматка ылайык, долбоор мамлекеттик бюджеттин эсебинен каржыланып, мектеп заманбап талаптарга жооп берген үлгүдө курулат. Башкы план боюнча имараттын жалпы аянты 4703 чарчы метрди түзүп, 4 блоктон турган 3 кабаттуу болуп салынат.
Жаңы корпус окуучулар үчүн бардык шарттар менен камсыздалат. Анда заманбап окуу класстары, лабораториялар, китепкана, эмгек кабинеттер, жыйындар залы, ашкана жана спорт залы каралган.
Курулуш-монтаждоо иштеринин ар бир этабы Турак жай-жарандык курулуш департаменти тарабынан көзөмөлдөнүүдө.
Белгилей кетсек, бул объект свайлык ыкма менен курулуп жаткан Кыргызстандагы алгачкы мектеп болуп саналат. Бул ыкма жер кыртышында суунун деңгээли жогору болгон шартта колдонулуп, имараттын туруктуулугун жана сапатын камсыздайт.
