Таласта мыйзамсыз курулуп жаткан соода жайына чара көрүлдү
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Талас регионалдык башкармалыгы аймактагы курулуш объектилерин туруктуу негизде көзөмөлдөөнү улантууда.
Жүргүзүлгөн текшерүүлөрдүн жыйынтыгында Талас шаарынын А. Оторбаев көчөсү, 241 дарегинде жайгашкан “КЫРМАН” (кампа) соода жайынын курулушунда мыйзам бузуулар аныкталды.
Тактап айтканда, курулуш жүргүзгөн жаран жер тилкесинин категориясын өзгөртпөстөн пайдаланган. Ошондой эле объект тиешелүү архитектуралык-уруксат берүүчү документтерсиз курулуп жатканы белгилүү болгон. Бул Кыргыз Республикасынын “Шаар куруу жана архитектура жөнүндө” мыйзамынын талаптарын бузуу болуп эсептелет.
Белгилей кетсек, буга чейин мыйзам бузууларды жоюу боюнча эскертүү берилгенине карабастан, талаптар аткарылган эмес. Натыйжада, жаранга карата мыйзам чегинде чаралар көрүлүп, мыйзам бузууларды жоюу боюнча жазуу түрүндө көрсөтмө берилди.
Мамлекеттик архитектура-курулуш контролдоо департаменти жарандарды курулуш иштерин баштоодо бардык керектүү уруксат берүүчү документтерди алдын ала алуу жана мыйзам талаптарын так сактоо зарылдыгын эскертет.
