УКМК Таласта 10 млн сомдон ашык жүктү мыйзамсыз алып кирүүгө бөгөт койду
Улуттук коопсуздук мамлекеттик комитети тарабынан күн мурун мамлекеттик чек аранын кыргыз-казак тилкесиндеги "Чоң-Капка" өткөрүү пунктунда мыйзамсыз жүк алып кирүү фактысына бөгөт коюлду.
Атайын кызматтын маалыматка ылайык, Кыргызстандын аймагына коммерциялык максатта арналган, тыюу салынган жана эсепке алынбаган товарлардын ири партиясы аныкталган. Алдын ала маалыматтар боюнча, жүктүн жалпы суммасы 10 миллион сомдон ашат.
Учурда бул факты боюнча зарыл болгон тергөө-ыкчам иш-чаралар жүргүзүлүүдө. Жыйынтыгында мамлекеттик чек ара аркылуу товарларды мыйзамсыз өткөрүү, милдеттүү төлөмдөрдөн качуу жана тыюу салынган продукцияны мыйзамсыз жүгүртүү боюнча тиешелүү процессуалдык чечим кабыл алынат.
УКМК мыйзамсыз алып кирүү, жашыруу жана тыюу салынган товарларды сатууга байланышкан аракеттер катуу көзөмөлгө алына турганын эскертип, мыйзам бузгандар жоопкерчиликке тартыла турганын билдирди.
Белгилей кетсек, ыкчам-издөө иш-чаралары Кыргыз Республикасынын Мамлекеттик чек ара кызматы жана Мамлекеттик салык кызматынын Талас облусу боюнча тиешелүү бөлүмү менен биргеликте жүргүзүлдү.
