Аравандагы дыйкандар алгачкы капуста түшүмүн экспортко чыгарууда
Ош облусунун Араван районунда жашылча-жемиштер башка аймактарга салыштырмалуу 2-3 жума эрте бышары белгилүү. Учурда райондо капустанын "басай" сорту бышып жетилип, дыйкандар алгачкы түшүмдү экспортко чыгара башташты. Бул тууралуу Айыл чарба министрлигинен бидиришти.
Жакынкы күндөрү жергиликтүү сорттогу капуста да бышып, ички базарларга сунуштала баштайт. Мындан тышкары, жаңы бышкан сарымсак дагы сатыкка чыга баштайт.
Маалыматка ылайык, Суу ресурстары, айыл чарба жана кайра иштетүү өнөр жайы министрлигинин адистери дыйкандарга түшүмдү экспортко чыгарууда керектүү документтерди даярдоого көмөктөшүп жатышат.
Араван райондук агрардык өнүктүрүү бөлүмүнүн башчысы Галдарбек Мадалиевдин маалыматына ылайык, райондо алгач капуста экспортко жөнөтүлөт. Андан кийин бадыраң, помидор, картошка, кулпунай жана кокон гилас бышып, сырткы рынокко чыгарылат.
Белгилей кетсек, Кыргызстанда өндүрүлгөн капуста негизинен Казакстан жана Россия мамлекеттерине экспорттолот.
