Ошто 124 млн сомго курулган “TES HOTEL” мейманканасы ачылды
Кечээ Ош шаарында заманбап талаптарга жооп берген “TES HOTEL” мейманканасынын жаңы имараты расмий ачылды. Иш-чарага шаар мэри Жанарбек Акаев жана Кыргыз-Орус өнүктүрүү фондунун жетекчиси Артем Новиков катышты. Бул тууралуу Ош шаарынын мэриясынан билдиришти.
Мейманкана алгач 2003-жылы 5 бөлмөлүү чакан конок үй катары ишин баштап, бүгүнкү күндө 52 бөлмөлүү заманбап комплекс катары кеңейди.
Долбоордун жалпы наркы 124 миллион сомду түзүп, анын ичинен 83 миллион сомдон ашууну Кыргыз-Орус өнүктүрүү фонду тарабынан каржыланган.
Жаңы имаратта энергияны үнөмдөөчү жана экологиялык технологиялар колдонулуп, заманбап жылытуу жана абаны тазалоо системалары орнотулган.
“TES HOTEL” негизинен чет өлкөлүк туристтерди жана иш сапар менен келген конокторду кабыл алат. Долбоор шаардагы мейманкана бизнесин өнүктүрүүгө салым кошкон заманбап объект катары бааланууда.
