Ошто “Мадина” кондитердик цехи ачылып, 100 жумуш орду түзүлдү
Кечээ Ош шаарында “Мадина” аталышындагы жаңы кондитердик цех ишке кирди. Ачылыш аземине шаар мэри Жанарбек Акаев, Орус-Кыргыз өнүктүрүү фондунун жетекчиси Артем Новиков, шаардык кеңештин төрагасы Болот Баетов жана коомдук ишмерлер катышты. Бул тууралуу Ош шаарынын мэриясынан билдиришти.
Иш-чарада шаар башчысы ишкерлер үчүн жагымдуу шарттарды түзүү багытында иштер жүрүп жатканын белгилеп, инвесторлорду кызматташууга чакырды. Анын айтымында, инвестициялык климатты жакшыртуу үчүн мамлекеттик кызматтарды ыкчамдатуу чаралары көрүлүүдө.
Аталган ишкана Орус-Кыргыз өнүктүрүү фондунун 63 млн сомдук колдоосу менен ачылып, 100 жумуш орду түзүлдү. Заманбап жабдуулар менен камсыздалган цехте 100дөн ашуун түрдөгү табигый таттуулар өндүрүлөт.
