Кочкор районунда “Адал азык” социалдык дүкөнү ачылды
Нарын облусунун Кочкор районунда калкты сапаттуу жана жеткиликтүү азык-түлүк менен камсыз кылууга багытталган “Адал азык” аталышындагы жаңы социалдык дүкөн өз ишин баштады. Бул тууралуу Айыл чарба министрлигинен билдиришти.
Аталган дүкөн “Тойбосс” жоопкерчилиги чектелген коому тарабынан ачылып, долбоор Кочкор райондук мамлекеттик администрациясы, Ормон-Хан айыл өкмөтү жана Кочкор райондук агрардык өнүктүрүү башкармалыгынын колдоосу менен ишке ашырылды.
Социалдык дүкөндө “Тойбосс” фирмасы өндүргөн продукциялар, ошондой эле уй, жылкы жана тоок эттери жеткиликтүү, арзан баада сунушталууда. Бул демилге жергиликтүү калкты сапаттуу азык-түлүк менен камсыз кылуу менен бирге, баалардын туруктуулугун сактоого жана азык-түлүк коопсуздугун чыңдоого багытталган.
Мындай социалдык долбоорлор аймактагы жашоочулар үчүн чоң колдоо болуп, калктын турмуш деңгээлин жакшыртууга өз салымын кошот.
