“Дөөлөт курулуш” объекттери боюнча иштер мамлекеттин көзөмөлүндө
Курулуш, архитектура жана турак жай-коммуналдык чарба министри Нурдан Орунтаев “Базис-М” ЖЧКсынын (“Дөөлөт курулуш” компаниясы подрядчы болгон) үлүш ээлери менен жолугушту. Бул тууралуу Курулуш министрлигинен билдиришти.
Белгилей кетсек, 2026-жылдын февраль айында жарандардын кайрылууларынын негизинде аталган компаниянын ишмердүүлүгү Президенттин көзөмөлүнө алынып, министрликке тиешелүү тапшырмалар берилген.
Акыркы эки айда документтерди юридикалык жактан тариздөө иштери жүргүзүлүп, анын негизинде министрликке караштуу “Мамлекеттик курулуш компаниясы” түзүлдү. Учурда тиешелүү документтер Юстиция министрлигинде каттоодон өтүүдө.
Алдыда жаңы компания “Базис-М” ЖЧКсынын объекттерине уюмдаштыруучу катары кирип, курулуш иштерин мыйзамдуу негизде жандандыруу пландалууда.
Министр Нурдан Орунтаев бул иштер көп баскычтуу жана татаал экенин белгилеп, юридикалык, техникалык жана финансылык маселелер убакыт талап кыларын билдирди.
Ошондой эле акыркы жылдары курулуш материалдарынын баасы кескин өзгөргөндүктөн, долбоорлорду кайра сметалык эсептөөлөрдөн өткөрүү зарылдыгы жаралган.
Жолугушууда үлүш ээлеринин суроолоруна жооп берилип, мындан аркы иштердин этаптары түшүндүрүлдү.
Белгилей кетсек, төрт жыл мурда турак жай сатып алган айрым жарандар бүгүнкү күнгө чейин батирлерин ала элек. Курулуш иштери каржылык көйгөйлөрдөн улам токтоп калган.
