Билим берүү кызматкерлеринин эмгек акысы жогорулатылды
Президенттин 2026-жылдын 26-мартындагы токтомуна ылайык, билим берүү кызматкерлеринин эмгек акысы жогорулатылды. Бул тууралуу Агартуу министрлигинин басма сөз кызматы билдирди.
Маалыматка ылайык, кызматтык окладдардын жана педагогикалык ставкалардын колдонуудагы өлчөмдөрүн 60%ге жогорулатуу каралган. Мындан тышкары билим берүү системасынын кызматкерлерине 15 000 сом, техникалык жана кенже тейлөөчү персоналга 5 000 сом өлчөмүндө президенттик компенсация төлөнөт.
Президенттик компенсация өргүүлөрдү, жөлөк пулдарды, ошондой эле бийик тоолуу шарттарда жана алыскы жетүүгө кыйын зоналарда жашагандыгы жана иштегендиги үчүн кошумча төлөмдөрдү эсептөөдө эске алынбайт жана бир ставка үчүн төлөнөт.
Жаңы эмгек акы төлөө шарттарында минималдык базалык ставка 7040 сом өлчөмүндө сакталат жана ал эмгек акыны эсептөөнүн негизи болуп калат.
Мындан тышкары, мугалимдердин эмгек акысы билим деңгээлине, педагогикалык иш стажына, окумуштуулук даражасына, ардак наамдарына, квалификациялык категориясына, ошондой эле бийик тоолуу жана алыскы шарттарда иштегендигине байланыштуу кошумча төлөмдөр жана үстөктөр менен аныкталат. Мурда STEM багытындагы мугалимдерге өзүнчө коеффициент колдонулса, эми бардык мугалимдер үчүн бирдей коеффициент киргизилди.
Белгилей кетсек, өлкө боюнча орточо эмгек акы 42 948 сомду түзөт, ал эми билим берүү кызматкерлеринин орточо эмгек акысы жогорулатылгандан кийин 50 551 сомго жетет.
