Ала-Букада уруксаты жок курулуш иштери токтотулду
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Жалал-Абад регионалдык башкармалыгы тарабынан аймактагы курулуш объектилеринде мыйзам талаптарынын сакталышы боюнча көзөмөл иштери улантылууда.
Ведомствонун маалыматына ылайык, текшерүү иштеринин жүрүшүндө Ала-Бука районуна караштуу Ала-Бука айылындагы Т.Сартманбетов көчөсүндө жайгашкан “Аль Барака” соода жайы тиешелүү архитектуралык-уруксат берүүчү документтерсиз курулуп жатканы аныкталды.
Маалыматка ылайык, курулуш иштерин жүргүзүп жаткан жаран А.З.Х. тарабынан курулушка уруксат берүүчү документтер алынган эмес. Бул Кыргыз Республикасынын “Шаар куруу жана архитектура жөнүндө” мыйзамынын талаптарын бузуу болуп саналат.
Белгилей кетсек, буга чейин аталган объект боюнча аныкталган мыйзам бузууларды жоюу тууралуу эскертүү берилген. Бирок коюлган талаптар аткарылган эмес.
Натыйжада жаран А.З.Х.га карата 200 миң сом өлчөмүндө айып пул салынып, мыйзам бузуулар толук жоюлганга чейин курулуш-монтаждоо иштери токтотулду.
Мамлекеттик архитектура-курулуш контролдоо департаменти жарандарды жана курулуш субъекттерин курулуш иштерин баштоодо бардык уруксат берүүчү документтерди өз убагында алып, мыйзам талаптарын так сактоого чакырат.
