Жаштар арасында коррупцияга каршы маданиятты калыптандыруу талкууланды
К.Карасаев атындагы Бишкек мамлекеттик университетинде “Жаштар арасында коррупцияга каршы маданиятты калыптандыруу: билим берүү мекемелеринин жана мамлекеттик органдардын кызматташтыгы” аттуу тегерек стол өткөрүлдү. Бул тууралуу Башкы прокуратурадан билдиришти.
Иш-чара Башкы прокуратура тарабынан уюштурулуп, ага Илим, жогорку билим берүү жана инновациялар министрлигинин коррупциянын алдын алуу маселелери боюнча ыйгарым укуктуу өкүлү, укук коргоо органдарынын кызматкерлери, университеттин окутуучулары жана студенттери катышты.
Тегерек столдун жүрүшүндө Башкы прокуратуранын өкүлү коррупциянын мамлекеттин өнүгүшүнө жана коомдогу адилеттүүлүккө тийгизген терс таасири тууралуу баяндама жасап, коррупцияга каршы күрөш мамлекеттик саясаттын артыкчылыктуу багыттарынын бири экенин белгиледи.
Ошондой эле жыйындын жүрүшүндө бул багытта жүргүзүлүп жаткан иштер тууралуу маалымат берилип, коррупцияга каршы аракеттенүүдө жаштардын ролу өзгөчө мааниге ээ экени баса белгиленди.
Иш-чаранын катышуучулары актуалдуу маселелер боюнча пикир алышып, коомдо коррупцияга каршы чыдамсыз мамилени калыптандыруу учурдун негизги талаптарынын бири экенин белгилешти.
Тегерек столдун жыйынтыгында маалыматтык-түшүндүрүү иштерин күчөтүү жана бул багытта мамлекеттик органдар менен билим берүү мекемелеринин кызматташтыгын арттыруу боюнча резолюция кабыл алынды.
