Бишкек мэри Биринчи Май районунда 650дөн ашык тургун менен жолукту
Күн мурун Бишкек шаарынын мэри Айбек Джунушалиев Биринчи Май районунун тургундары менен жолугушуу өткөрдү. Иш-чара балдардын жана өспүрүмдөрдүн "Сейтек" улуттук борборунда өтүп, ага 650дөн ашык адам катышты.
Жолугушуу саат 16:00дө башталып, жети сааттан ашык убакытка созулду. Тургундар жер мунапысы, канализация, ичүүчү суу, коомдук транспорт, социалдык жана муниципалдык объектилерди куруу жана оңдоо маселелерин көтөрүштү.
Ар бир маселе боюнча тиешелүү кызматтарга жана мекеме жетекчилерине тапшырмалар берилди.
Шаар мэри ААРнын алкагында кошулган айылдарда бюрократиялык мамиле жана формалдуу жооптор болбошу керектигин белгиледи.
Жолугушууда муниципалдык объектилерди пайдалануу маселеси да талкууланды. Маалыматка ылайык, 2025-жылы шаарга сегиз объект кайтарылып берилип, алардын бешөө калыбына келтирилип ишке берилген.
Тургундар сейил бактардагы башаламан соода маселесин да көтөрүштү. Мэр коомдук жайларда соода атайын белгиленген жерлерде гана жүргүзүлүшү керектигин айтты.
Жолугушууда коомдук кабылдамалар иштеп, тургундар жазуу түрүндөгү кайрылууларын тапшырышты. Ошондой эле прокуратуранын, ички иштер органдарынын жана башка мамлекеттик кызматтардын өкүлдөрү жеринде иш алып барышты.
Белгилей кетсек, Ленин районунун тургундары менен жолугушуу 15-майда саат 16:00дө К. Карасаев атындагы Бишкек гуманитардык университетинде өтөт. Дареги: Ч.Айтматов проспектиси, 24.
