Кыргыз мал чарба институтунда жаңы химиялык лаборатория ишке берилди
Бүгүн Суу ресурстары, айыл чарба жана кайра иштетүү өнөр жайы министрлигине караштуу Кыргыз мал чарба жана жайыттар илимий изилдөө институтунда капиталдык оңдоодон өткөн имараттын жана жаңы химиялык лабораториянын ачылыш аземи болуп өттү.
Ведомствонун маалыматына ылайык, иш-чарага министрдин орун басары Асел Кененбаева катышып, институттун материалдык-техникалык базасын чыңдоо илимди жана мал чарбасын өнүктүрүүгө чоң салым кошорун белгиледи.
Ошондой эле мекеменин ишмердүүлүгүн колдоо максатында институтка жаңы микроавтобус тапшырылды. Андан соң мал чарбасын туруктуу өнүктүрүү маселелерине арналган эл аралык илимий-практикалык конференция өткөрүлдү.
Жыйынга Корея Республикасынын Кыргызстандагы элчиси, KOPIA борборунун жетекчиси, ошондой эле Өзбекстан, Тажикстан жана Казакстандан келген адистер катышты.
Маалыматка ылайык, илимий институттун имараты KOPIA борборунун колдоосу менен капиталдык оңдоодон өткөрүлгөн. Ал эми жаңы химиялык лаборатория үчүн жабдуулар республикалык бюджеттин эсебинен сатылып алынган.
