Кыргызстанда азык-түлүк баалары өзгөрдү: пияз менен картошка кымбаттады

Кыргызстанда ошондой эле Россия жана Казакстанда негизги азык-түлүк товарларынын бааларына салыштырма мониторинг жүргүзүлдү. Анализ нан азыктары, картошка, жашылча-жемиштер, эт, сүт, кумшекер, жумуртка жана өсүмдүк майы сыяктуу товарларды камтыды. Бул тууралуу Айыл чарба министрлигинен билдиришти.

Мониторингдин жыйынтыгында Кыргызстанда айрым азык-түлүк товарларынын баасы жогорулаганы аныкталды. Тактап айтканда, баш пияз 7%, картошка 6,5%, кой эти 3,3%, уй эти 2,4% жана кумшекер 1,1% кымбаттаган. Ошондой эле жергиликтүү 1-сорттогу буудай уну, пастерленген сүт, макарон азыктары жана нан азыктарынын баасында да аз өлчөмдө өсүү байкалган.

Ошол эле учурда жумуртканын баасы 2,5% төмөндөсө, импорттолгон 1-сорттогу буудай уну 0,1% арзандаган.

Казакстанда макарон азыктарынын баасы кескин өсүп, спагетти 25,5% кымбаттаганы белгилүү болду. Мындан тышкары сабиз, күрүч жана уй этинин баасы өскөн. Ал эми тандыр нан, баш пияз, кумшекер, картошка жана сүт азыктары арзандаганы байкалган.

Россияда болсо сабиз, картошка, кумшекер жана эт азыктарынын баасы бир аз жогорулаган. Ошондой эле өсүмдүк майы, күрүч жана жумуртканын баасында өсүү катталган. Ал эми пастерленген сүттүн баасы 0,4% төмөндөгөн.

Мониторинг азык-түлүк рыногундагы баалардын өзгөрүүсүнө туруктуу көзөмөл жүргүзүү максатында өткөрүлгөн.