Токмоктогу ден соолукту чыңдоо комплексинин курулушу токтотулду
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Чүй регионалдык башкармалыгы Токмок шаарындагы курулуш объектилерине текшерүү жүргүздү.
Текшерүүнүн жүрүшүндө Ленин көчөсү 298 дарегинде жайгашкан ден соолукту чыңдоо комплексинин курулушунда мыйзам бузуулар аныкталган.
Маалыматка ылайык, жаран Х.Б.Х. курулуш-монтаждоо иштерин тиешелүү долбоордук жана уруксат берүүчү документтерсиз жүргүзүп жаткан. Бул Кыргыз Республикасынын “Шаар куруу жана архитектура жөнүндө” мыйзамынын талаптарын бузуу болуп эсептелет.
Аталган факты боюнча мыйзам бузууларды жоюу тууралуу көрсөтмө берилип, 200 миң сом өлчөмүндө айып пул салынды. Ошондой эле бардык тиешелүү документтер толук таризделгенге чейин курулуш иштери токтотулду.
Мамлекеттик архитектура-курулуш контролдоо департаменти жарандарды жана курулуш компанияларын курулуш иштерин баштоодон мурда бардык уруксат берүүчү документтерди өз убагында алып, мыйзам талаптарын так сактоого чакырды.
