Бакуда Кыргызстандагы ири туристтик долбоорлор тааныштырылды

Азербайжандын Баку шаарында өткөн Бүткүл дүйнөлүк шаарлар форумунун (WUF13) 13-сессиясында Кыргызстандагы ири туристтик жана инфраструктуралык долбоорлор сунушталды. Бул тууралуу Курулуш министрлигинен билдиришти.

Форумга дүйнөнүн 182 өлкөсүнөн 45 миңден ашуун делегат катышты. Иш-чаранын алкагында Президент Садыр Жапаров сөз сүйлөп, Кыргызстан тоолуу аймактарды туруктуу өнүктүрүүгө өзгөчө көңүл буруп жатканын белгиледи. Ошондой эле ал тоолуу шаарларды өнүктүрүү боюнча Эл аралык тоолуу шаарлар ассоциациясын түзүү демилгесин көтөрдү.

Urban Expo көргөзмөсүндө Курулуш, архитектура жана турак жай-коммуналдык чарба министри Нурдан Орунтаев Ысык-Көлдүн Тамчы айылында курулуп жаткан заманбап туристтик комплекстердин эскиздик долбоорлорун тааныштырды.

Алардын катарында:

• “Tamchy Resort” — батирлер, коттедждер, виллалар жана эс алуу аймактары камтылган туристтик комплекс;
• “Urpaq Resort” — төрт мезгилдүү курорттук резиденция, аквапарк жана жеке пляжы менен;
• “Elizaveta Resort” — премиум-класстагы эс алуу комплекси сунушталды.

Маалыматка ылайык, Президенттин тапшырмасынын негизинде Тамчы айылында 100 гектар аянтка туристтик шаарчалар курулуп жатат. Долбоорлордо аймактын 70%ы жашыл зона жана эс алуу инфраструктурасы үчүн сакталат.

Мындан тышкары, форумда Бишкектеги таштандыны кайра иштетүүчү заводдун долбоору дагы көрсөтүлүп, ал экологиялык коопсуздукту камсыздоого багытталган маанилүү демилгелердин бири катары бааланды.