Бишкек менен Новосибирск биргелешкен долбоорлорду ишке ашырууну талкуулады
Күн мурун Бишкек шаарынын мэриясында Бишкек шаарынын мэринин биринчи орун басары Кубанычбек Иманалиев менен Новосибирск облусунун Мыйзам чыгаруу жыйынынын төрагасынын орун басары Майис Мамедовдун жолугушуусу өттү.
Муниципалитеттин маалыматына ылайык, жолугушуунун жүрүшүндө тараптар эки тараптуу кызматташтыктын кеңири багыттарын талкуулашты. Атап айтканда, шаардык инфраструктураны өнүктүрүү, курулуш жана өнөр жай тармактары, транспорт жана логистика маселелерине көңүл бурулду. Мындан тышкары, ишкерликти колдоо жана бизнес активдүүлүктү өнүктүрүү боюнча пикир алмашуу болду.
Кубанычбек Иманалиев Бишкек шаарынын мэриясы өнөктөштүктү кеңейтүүгө, заманбап шаардык инфраструктураны өнүктүрүү боюнча тажрыйба алмашууга жана инвестицияларды тартууга кызыкдар экенин белгиледи.
Тараптар аймактар аралык байланыштарды чыңдоо жана шаарлардын туруктуу өнүгүшү үчүн практикалык тажрыйба алмашуунун маанисин баса белгилешти. Ошондой эле бул жолугушуу кыргыз-орус аймактар аралык кызматташтыгын мындан ары өнүктүрүүгө жана Бишкек менен Новосибирск облусунун ортосундагы өнөктөштүктү бекемдөөгө кошумча өбөлгө түзөрүнө ишеним билдиришти.
Жолугушуунун жыйынтыгында тараптар социалдык, инфраструктуралык жана инвестициялык багыттагы биргелешкен долбоорлорду ишке ашырууга жана мындан ары активдүү кызматташууну улантууга кызыкдар экендиктерин тастыкташты.
