Бишкекте II кыргыз-венгер тамак-аш өнөр жай форуму өттү
Бүгүн Бишкек шаарында мамлекеттик органдардын, бизнес өкүлдөрүнүн жана Венгриянын кайра иштетүү жана тамак-аш технологиялары жаатындагы алдыңкы компанияларынын катышуусунда II кыргыз-венгер тамак-аш өнөр жай форуму өттү. Бул тууралуу Айыл чарба министрлигинен билдиришти.
Форумдун алкагында Суу ресурстары, айыл чарба жана кайра иштетүү өнөр жайы министринин орун басары Рустам Балтабаев Венгрия Кыргызстан үчүн ишенимдүү жана стратегиялык өнөктөш экенин белгиледи.
Анын айтымында, кайра иштетүү өнөр жайын өнүктүрүү өлкөнүн мамлекеттик саясатынын негизги багыттарынын бири болуп саналат. Министрлик учурда айыл чарба продукцияларын кайра иштетүүнү өнүктүрүү, өндүрүштөрдү модернизациялоо, заманбап технологияларды киргизүү жана экспорттук потенциалды жогорулатуу боюнча активдүү иштерди жүргүзүүдө.
Форумда технологиялык өнөктөштүк, биргелешкен инвестициялык долбоорлор жана агроөнөр жай инфраструктурасына заманбап чечимдерди киргизүү маселелерине өзгөчө көңүл бурулду.
Рустам Балтабаев буга чейин Венгрияда өткөн II Кыргыз-Венгрия агрардык форумуна катышып, венгриялык компаниялар менен түз сүйлөшүүлөр жүргүзүлгөнүн эске салды.
“Бүгүн биз ошол байланыштардын практикалык жыйынтыктарын көрүп жатабыз. Кыргызстанда венгриялык технологияларды, анын ичинде ирригация жана агроөнөр жай инфраструктурасын модернизациялоо багытында киргизүү башталууда”, — деди ал.
Форумдун жүрүшүндө венгер-кыргыз өнүктүрүү фондунун мүмкүнчүлүктөрү тааныштырылып, Maurer Gép, Unimatik жана InnovaSter-Trade компанияларынын өкүлдөрүнүн катышуусунда B2B жолугушуулар уюштурулду.
Жыйынтыгында тараптар кыргыз-венгриялык кызматташтыкты кеңейтүүгө, биргелешкен долбоорлорду өнүктүрүүгө жана технологиялык өнөктөштүктү бекемдөөгө кызыкдар экенин билдиришти.
