Д.Амангелдиев: Күйүүчү майдын баасы эки жумада бир жолу 1 сомго кымбаттайт
Министрлер Кабинетинин төрагасынын биринчи орун басары Данияр Амангелдиев күйүүчү майдын баасы эки жумада бир жолу бир сомго кымбаттайт деп билдирди. Бул тууралуу ал “Биринчи радионун” эфиринде айтты.
Амангелдиев акыркы күндөрү дүйнөлүк биржаларда дизел жана бензиндин баасы үч эсе өскөнүн кошумчалады.
Буга чейин бензиндин тоннасы 600 доллардын тегерегинде болсо азыр 1200гө чейин чыкты.
“Биз күйүүчү жана майлоочу майлардын 99,9% Орусиядан импорт кылабыз. Дүйнөдө болсо баа көтөрүлдү. Бааны чектеп койгонго өкмөттүн толук мүмкүнчүлүгү бар. Бирок бааны чектесек Кыргызстанга күйүүчү майды эч ким алып келбей калат да таңкыстык пайда болот. Таңкыстык болгон жакшыбы же бааны турукташтырып кармап турган жакшыбы? Бул өтө чоң маселе. Акыркы күндөрү дүйнөлүк биржаларда баа үч эсе өсүп кетти. Буга чейин бензиндин тоннасы 600 доллардын тегерегинде болсо азыр 1200гө чейин чыгып кетти. Биз бааны дароо көтөрүп жибербей эки жумада бир жолу бир сомго көтөрүп турууга мүмкүнчүлүк бар. Эгер дүйнөлүк биржаларда баа түшсө Монополияга каршы жөнгө салуу кызматы күйүүчү майды импорттогон компаниялар менен иштеп, бааны түшүргөнгө аракет кылат”, - деди Амангелдиев.
