Ноокатта кычкылтек өндүрүүчү жаңы станция ишке кирүүгө даяр

Ноокат райондук аймактык ооруканасынын базасында курулган жаңы медициналык кычкылтек өндүрүүчү станциянын тесттик сыноолору ийгиликтүү аяктады. Бул тууралуу БУУнун Өнүктүрүү программасынан билдиришти.

Маалыматка ылайык, долбоор Саламаттык сактоо министрлиги менен өнөктөштүктө БУУӨП тарабынан ишке ашырылып, Глобалдык фонд тарабынан каржыланган.

Жаңы станция COVID-19 пандемиясы маалындагы кычкылтек тартыштыгы сыяктуу көйгөйлөрдү чечүү максатында курулган. Германиядан чыгарылган заманбап жабдуулар менен камсыздалган станция суткасына 100-150 баллон, же 1 200 куб метр медициналык кычкылтек өндүрө алат.

Белгиленгендей, бул көлөм Ноокат районунун гана эмес, коңшу 3-4 райондун муктаждыгын дагы камсыздоого жетиштүү болот.

Мурда медициналык кычкылтек сатып алууга жылына орто эсеп менен 32 млн сом сарпталса, эми чыгымдар 3,7 млн сомго чейин кыскарары айтылды.

Ноокат аймактык ооруканасынын директору Кубатали Азимбаев учурда кычкылтек берүүчү түйүндөр дээрлик бардык палаталарга жана кабыл алуу бөлүмүнө орнотулганын билдирди. Анын айтымында, бул жыл сайын пневмония менен ооруканага түшкөн 2 500дөн ашуун балага жана башка оор бейтаптарга өз убагында жардам көрсөтүүгө шарт түзөт.

Маалыматта станция толугу менен мамлекеттик баланска өткөрүлүп берилери белгиленди.