Бишкекте №3 мектептин кошумча окуу корпусунун курулушу жүрүп жатат

Бишкек шаарынын мэриясынын Капиталдык курулуш башкармалыгы тарабынан 5-кичирайондо жайгашкан №3 орто мектептин кошумча окуу корпусунун курулуш иштери улантылууда.

Муниципалитеттен билдиришкендей, жаңы окуу корпусу 500 окуучуга ылайыкталып, үч кабаттуу жана жер төлөсү менен Т-түрүндөгү формада курулуп жатат. Долбоордун негизги максаты — окуучулар үчүн заманбап жана ыңгайлуу шарттарды түзүү, ошондой эле мектептин негизги имаратына түшкөн жүктү азайтуу болуп саналат.

Жаңы имаратта окуу класстары, спорт зал, актовый зал, ашкана, медициналык кабинет, директор жана завучтардын кабинеттери, мугалимдер бөлмөсү, музыка жана ырдоо кабинети, жуунуучу бөлмөлөр жана санитардык түйүндөр жайгашат.

Ал эми жер төлө бөлүгүндө техникалык жайлар каралып, анда жылуулук түйүнү, насос станциясы, желдетүү системасы, электр бөлүштүрүүчү бөлмө жана кампалар орун алат.

Мындан тышкары, долбоордун алкагында мектептин аймагын комплекстүү көрктөндүрүү иштери жүргүзүлөт. Атап айтканда, мини-футбол аянтчасы, волейбол жана баскетбол аянтчалары, воркаут зонасы, 100 метрлик чуркоо тилкеси жана жашыл аймактар курулат.

Учурда объектте фасаддык жана ички жасалгалоо иштери жүрүп, желдетүү системасы орнотулууда. Ошондой эле мектептин аймагын көрктөндүрүү иштери да аткарылып жатат.