Кореянын инновациялык технологиялары кыргыз дыйкандарына сунушталды
Суу ресурстары, айыл чарба жана кайра иштетүү өнөр жайы министри Эрлист Акунбеков Корея жана Кыргызстанды өнүктүрүү ассоциациясы тарабынан уюштурулган туруктуу айыл чарба жана өнөр жай көргөзмөсүнө катышты. Бул тууралуу ведомстводон билдиришти.
Аталган көргөзмө Борбор Азиядагы жана дүйнөдөгү ушул форматтагы алгачкы көз карандысыз туруктуу көргөзмө аянтчаларынын бири болуп саналат. Анда Корея Республикасынын заманбап айыл чарба жана өнөр жай технологиялары сунушталды.
Иш-чаранын негизги максаты — эл аралык кызматташууну өнүктүрүү, инновациялык технологияларды жайылтуу, Кыргызстандын агроөнөр жай тармагын колдоо жана Кыргызстан, Корея Республикасы менен Борбор Азия өлкөлөрүнүн компаниялары үчүн туруктуу ишкердик аянтчасын түзүү болуп саналат.
Көргөзмөнүн өнөктөштөрү жана демөөрчүлөрү катары "MOST PLUS" ЖЧК, Bio-Agro ЖЧК, Кореянын айыл чарба продукцияларын бөлүштүрүү корпорациясы, Борбор Азиянын үрөөнчүлөр ассоциациясы жана агроөнөр жай тармагындагы бир катар компаниялар катышты.
Көргөзмөнүн алкагында айыл чарба жана өнөр жай тармагындагы алдыңкы технологиялар, заманбап жабдуулар, күнөскана чарбасы үчүн инновациялык чечимдер, продукцияны кайра иштетүү, сугат системалары, үрөөнчүлүк, экологиялык таза өндүрүш жана Кореянын өнөр жай секторундагы технологиялары көрсөтүлдү.
