Кыргызстанда акыркы 3 жылда 55 бөйрөк алмаштыруу операциясы жасалды
Министрлер Кабинетинин төрагасынын орун басары Улан Маматканов органдардын донорлугу жана трансплантациясы боюнча эл аралык симпозиумга катышты. Бул тууралуу Өкмөттүн Басма сөз кызматынан билдиришти.
Иш-чарага 10дон ашуун өлкөнүн окумуштуулары жана дарыгерлери чогулду.
Улан Маматканов өз сөзүндө трансплантология тармагын өнүктүрүү заманбап технологиялардын жана эл аралык тажрыйбанын негизинде адамдардын өмүрүн сактап калууга чоң мүмкүнчүлүк түзүп жатканын белгиледи.
Ал акыркы жылдары саламаттыкты сактоо тармагын каржылоо кыйла көбөйгөнүн айтып, 2021-жылы бул тармакка 21,5 миллиард сом бөлүнсө, 2025-жылы сумма 52 миллиард сомго жеткенин билдирди.
Маалыматка ылайык, акыркы үч жылда республикалык бюджеттин эсебинен 55 бөйрөк алмаштыруу операциясы жана 3 боор трансплантациясы жасалган. Ошондой эле 2024-жылы Кыргызстанда биринчи жолу жилик чучугун алмаштыруу операциясы ийгиликтүү өткөн.
Симпозиумдун жүрүшүндө бөйрөк, боор жана жүрөк трансплантациясынын заманбап ыкмалары, донордук, инфекциялык коопсуздук жана медициналык кадрларды даярдоо маселелери талкууланды.
